مرحباً بالأصدقاء اللطيفين🌻
التدوينة هذي مخصصة لاستعراض بعض الصفحات من كتاب جميل
جداً وأعتبره كنز 🌺🍃
بدت القصة في ١ ابريل، كنت ابحث عن صور جميلة اشاركها
وتكون تعبر عن شهر ابريل وقدوم الربيع
لقيت رسمة جميلة من كتاب وعرفت ان المؤلفة اسمها ايديث هولدين
لما جا ١ مايو، فكرت ابحث عن صور تناسب شهر مايو ومن نفس الكتاب
بعدها، فكرت انو ليش ما ابحث عن الكتاب، يمكن أقدر أطلبه من الانترنت
وحابة أقتنيه بجد لأنه عن الطبيعة والنباتات🌿💕🌳
لقيته بموقع أمازون بريطانيا وماصدقت خبر! سعره كان رخيص جداً جداً!
صحيح انه مستعمل، لكنه قديم يعني يعتبر كنز! سعره كان ٢ ونص ريال متخيلين؟ والشحن ب٣٥ ريال
قلت يله الموضوع شكله لعبة لكن باجرب وأطلبه، كان مكتوب انه بيوصل
بعد شهر ومافيه رقم تتبع للشحنة😅 يعني أنتظر شهر وأنا مو عارفة هل بيوصلني أو لا
لكنه وصل! وصل البارح😭♥️ شهر بالضبط
الفكرة اللي توصلت لها ان صاحب الكتاب يبي يتخلص منه بأي شكل
هذا هو الكتاب اللي أعتبره كنزي الحالي (بما ان كنوزي واجد)
الكتاب عبارة عن نسخة مصورة من يوميات أو مذكّرات عالِمة الطبيعة “ايديث هولدين”، السيدة الإدوارديّة البريطانية
كانت رسّامة ولها كتب عديدة في مجال الطبيعة🍃🌺
الكتاب كان له طبعات عديدة، المهم ان النسخة اللي بين يديني من ١٩٨٠! كنننز😩💕
مذكرات “ايديث” تحتوي على معلومات بسيطة عن كل شهر ومقولات
عنه وأبيات شعر في الأشهر والفصول وملاحظاتها عن الطبيعة من
حولها في أيام عديدة من كل شهر🌷 كل هذا مكتوب بخط يدها ورسوماتها الجميلة
والمذكرات هذي كانت مذكراتها لسنة ١٩٠٦م
كان لها نفس طريقة هذي المذكرات لسنة ١٩٠٥م برضو
الكتاب واضح عليه قد ايش هو قديم لكن صاحبه مستعمله استعمال نظيف جداً✨
شايفين اطراف الصفحات كيف لونها؟ ورائحة الورق شي آخر🤦🏻♀️💕
هذي صفحة ابريل اللي شفتها بتمبلر وأبهرتني🌟🌿
وهنا صفحات يونيو🌞🌻
وهذي هيه “ايديث هولدين”، السيدة البريطانية🇬🇧
مواليد ٢٦ سبتمبر ١٨٧١
توفيت يوم ١٥ مارس ١٩٢٠ غرقاً، لما كانت تحاول توصل لغصن براعم الكستناء
على ضفة النهر لكنها تعثرت ووقعت في النهر وغرقت.. عثروا عليها في صباح اليوم التالي ميتة💔
لكنها ماتت وهي تعمل الشي اللي تحب وبالمكان اللي تحب🌳🌺
الكتاب أخذ قلبي من نواحي عديدة♥️ لذلك حبيت أوثّق حماسي له
في تدوينة عشان لما اقراها في المستقبل أحس بالحماس والحياة اللي أنا عايشتها ولله الحمد أولاً وأخيراً🍃
أتمنى تكونوا استمتعتوا بالتدوينة الخفيفة هذي🌻 وأشوفكم على خير