مرحبًا بالأصدقاء
مثل ماوعدتكم، توفرت اليوم النسخة الانجليزية من التقويم في المتجر
النسخة مجانية وطبعًا نفس الكلام عند النسخة العربية
لطفًا نشر التقويم ومشاركته يكونون باستخدام رابط التقويم في المتجر فقط
تقويم عام ٢٠٢٢م – النسخة الانجليزية
وشكرًا لدعمكم الدائم
🌷
أهلًا بالأصحاب
كيفكم مع البرد اللي دخل فجأة؟🥶
رجعت لعادتي السنوية واللي إلى شهر اكتوبر وأنا متوقعة اني باتخلى عنها هذي السنة، لكن الحمدلله جمعت لي وقت من هنا وهناك وقدرت أنجز التقويم رغم انه للأسف ماحصل لي فرصة طباعته، لكن خيرة ان شاء الله
عالأقل طلعت بتقويم لطيف وأحسه يشبهني وحبيته💕 وان شاء الله انتوا برضو تحبونه🌷
في الحقيقة، كنت محتارة جدًا هل انزله بمبلغ بسيط في متجري، أو يكون مجاني
، لأنو حطيت فيه جهد ووقت ومال، لكن جت امي الله يحفظها وقالت: يابنتي خليه مجاني عشان الناس تدعيلك🦋
ف نزلته مجاني كعادتي اللي بدأتها عام ٢٠١٦م🦖
تسعدني جدًا تعليقاتكم ودعمكم، لو ماكان فيه أشخاص راسلوني يسألوني إذا فيه تقويم هالسنة أو لا، يمكن ماكنت باتشجع وأسرق من وقتي المزحوم لتصميم التقويم
تقويم هذي السنة مافيه شي مميز، مافيه نجوم ولا أعشاب ولا اقتباسات، لكنه رقيق جدًا وهذا يكفي🐣
تقدرون تضيفونه لسلتكم بالمتجر وتكملون الطلب (مجاني) وراح يوصلكم رابط التحميل على الإيميل📩
يسعدني جدًا نشركم للتقويم🌻 ولكن اللي حاب ينشره، أتمنى ينشره برابط المتجر عشان يوصلني العدد الحقيقي لمرات التحميل، يعني لما شخص يحمله بجهازه، ويروح ينسخ الملف ويرسله لأحد كـ ايميل او اير دروب او واتس اب، هذا مرة مايساعدني، انشروا رابط التقويم بالمتجر لأنه أصلًا مجاني وبكذا اكون شاكرة لكم🪴
رابط التقويم بمتجري، متجر ساحة الياسمين -تحميل مجاني-
تقويم عام ٢٠٢٢م – النسخة العربية –
هذا بالضبط الرابط اللي ممكن تنشرونه لو حابين تشاركون التقويم مع أحد
سعيدة باستمراري في صناعة مطبوعات لطيفة، وترقبوا النسخة الانجليزية للي يفضلها😆
ودمتم سالمين
🪴
أهلًا بالأصحاب🌷
بعد انقطاع طويل عن التدوين، رجعت بتدوينة مختلفة عن السابق🎋
في منتصف شهر يونيو ٢٠٢١، رزقني الله بطفلي الأول “فيصل”♥️ وهذي التدوينة راح تكون عنه👶🏻🍼 وراح تكون طويلة لأن قصته مع الحساسية كانت طويلة، حاولت أختصرها قد ما أقدر وهذا اللي طلع معي☕️🍩
أول شهر ونص تقريبًا من عمر فيصل، كان يرضع طبيعي وصناعي، بس في الغالب صناعي، لما كمل شهرين تقريبًا، صار يرجّع (يكرم القارئ) كثير لدرجة مرة رجع وهو على ظهره وطلع من خشمه وفمه وشرق فيه وماصار يقدر يتنفس 💔 هذاك اليوم انهرت مرة خفت عليه يالله فكته الشرقة😢 وصرت انومه عالجلاسة حتى بالليل، عشان راسه يظل مرتفع
أخذته للطبيب ولما قلت له عالترجيع، وشاف وجهه فيه اكزيما (عنده من الولادة) قال هوه عنده حساسية بروتين حليب البقر ولازم تغيرين الحليب (كان على حليب نان التركيبة العادية)، وصف له حليب “بليميل بلص اتش ار” اساسه بروتين الأرز، بالإضافة لمرهم إليكا للاكزيما
الحليب كان ثقيل وفيصل ماتقبله كثير، وانا كأم ماكنت مقتنعة ان عنده حساسية وفيه احساس بالذنب ماعرف سببه ايش، مع ان مالي يد بظهور الحساسية، أصلاً حتى بعد ماوقفنا حليب “نان” بدت تطلع اكزيما بكل جسمه🥲
بعد علبتين من حليب الأرز، رجعت للطبيب وقلت غيّر الحليب😅 ف وصف له حليب “هيرو اف إي اتش” أساسه حليب البقر لكن بروتينه مفكك كليًا بحيث المعدة ماتتعرف عليه ولا تتحسس منه. هذا الحليب مشكلته غالي، ١١٠ ريال للعلبة اللي تاخذ ٤ ايام مقابل الحليب العادي (بين ٣٠ و٤٠ ريال) لكن قررت استخدمه شهر بعدين اشوف
اول مابدينا فيه صار يجي فيصل اسهال (يكرم القارئ) بشكل متكرر في اليوم، كلمت “الصحة 937” وقال الطبيب عطيه اسبوعين اذا ماراح الاسهال غيري الحليب
سافرنا خلال هذا الوقت وتعبت معاه نفسيًا وجسديًا لأن مع الاسهال لازم كل شوي أغير له وحبيبي صار عنده التهاب بمنطقة الحفاض ومرة يبكي بحرقة مايبيني أغير له لأن يوجعه
بعد السفر كمل تقريبًا اسبوعين ف رحت لطبيبة وصفت له مرهم فيوسيدين وميبو للالتهاب، وحليب خالي اللاكتوز عشان الاسهال يوقف
وقف الاسهال من اول يوم الحمدلله، وعالجنا الالتهاب لمدة خمسة ايام بالمراهم والتهوية المستمرة وبفضل الله تعافى من الالتهاب
خلصت علبة حليب خالي اللاكتوز ولأنها كانت بس للعلاج، صار لازم نغير الحليب عن الأول، فقررت أرجع لحليبه الأول “نان” واشوف، رجعنا له ومن اول يوم زادت الحساسية بوجهه، فقلت لا خلاص يانهله اقتنعي يله🥲
كلمت الدكتورة فقالت فيه حليب حل ثالث للحساسية اسمه “نيوكيت” واساس تركيبه أحماض أمينية🙂 ماهو حليب يعني، باختصار تركيبة غذائية للرضع اللي يعانون من الحساسية، بس قالت لي مشكلته غالي، لما بحثت طلع ان العلبة ب٢٢٠ ريال🥲 فدا فيصل لو الموضوع يستاهل. بس بنفس الوقت قالت لي اقترح عليك تروحي مستشفى الولادة والاطفال لأن بيصرفوه له
بالبداية أخذت علبة نيوكيت عشان على ماندبر موضوع مستشفى الولادة والأطفال، صرفوه لنا بعد يومين من استخدامنا للعلبة اللي اشتريناها، لكن كانوا قد غيروا وزارة الصحة من نيوكيت لشركة ثانية لكن نفس التركيبة، اسمه “أمينوفا”. كنت باستمر على نيوكيت لأن حرام ب٢٢٠ريال😅 لكن، ياجماعة مرة فضيع، ريحته تشبه الخل ومررررة بودرة لدرجة اول ما افتح العلبة لازم أشرق بغباره من كثر ماهو بودرة ويتطاير، ومرة مرة الحمدلله على النعمة، طعمه حمض🥲💔 أول ما أخذنا أمينوفا وفتحت العلبة وشفت انه افضل من نيوكيت، علطول قفلت نيوكيت وحطيته على جمب وبديت أمينوفا، واستمرينا عليه لمدة شهر لكن الاكزيما بوجهه ما اختفت.. ف حسيت ليش نستمر على هذا الحليب دام الاكزيما ماراحت، معناتها فيصل ماعنده حساسية بروتين بقري، وان الاكزيما موجودة بسبب ثاني او ربما بدون سبب
رحت بفيصل لطبيب جلدية وسألته سؤال عبيط😅 قلت هل تقدر تعرف وش اللي سبب له الاكزيما؟ او عالاقل قول اذا هي بسبب حليب البقر او لا
فقال اذا انتي قطعتي الحليب البقري ولسى ماراحت معناها الحليب ماله دخل (هذا اللي كنت ابي اسمعه من طبيب لأني مؤمنة فيه كأم لفيصل)
طلعت من العيادة وعالصيدلية اشتريت حليب بتركيبة عادية بس هالمرة غيرت من “نان” واخذت “اس ٢٦” واول مارجعنا اعطيت فيصل رضعة منه.. رضعه عادي ونام. صحى بعدها بساعة وشي وبطنه يطلع اصوات وفجأة رجّع (يكرم القارئ) ترجيع اصفر شبه شفاف وكثير، وقام يبكي الترجيع اوجعه 😢 اول ماشفته كذا قلت لأبوه يكلم استشاري اطفال يعرفه، ويسأله هل اكمل عالحليب او لا، وهل يحتاج علاج عشان لايجيه جفاف
الاستشاري قال جربوا رضعة ثانية اذا نفس الشي وقفوا، وانو الافضل تكملون على امينوفا، ف خفت على فيصل ووقفت الحليب العادي ظنًا مني انه بسبب بروتين البقر، وكملنا على امينوفا وعطيته مرهم “لوكويد” للاكزيما لمدة ٥ ايام وراحت “”مؤقتنًا كالعادة لأن المرهم بس للتخفيف فترة وبعدين ترجع””..
رجعت الاكزيما، وانا معصبة على امينوفا😅 ولأن عمر الأكل قرب ف شايلة هم انو الأكل اغلبه منتجات ألبان، وحليب أمينوفا متعب مايذوب مرررة صعب ياخذ وقت فتخيلوا كل رضعة اجلس ارج القارورة بقوة يدي راحت فيها وفيصل عديم الصبر بس يبكي وانا اجهز الرضعة🥲 فبديت اعصب لأني موقنة انه ماعنده حساسية وانا اضيع وقت ونفسية عالفاضي،، قرأت عن تغيير الحليب للرضع وقررت ارجع على “نان” بالتدريج.
قرأت انو التغيير من حليب الى حليب ذو تركيبة مختلفة لازم يصير بالتدريج، اليوم الاول ربع من الجديد وثلاثة ارباع من القديم، اخلطهم بنفس الرضعة، اليوم الثاني نص ونص، وهكذا
انا قررت انو آخذ الموضوع بالراحة اكثر، اول يومين كان ربع وثلاثة ارباع، اليومين اللي بعدها ثلث وثلثين، وهكذا
اول رضعة، رجّع نفس هذيك المرة، اصفر شبه شفاف، وتعب كذا وصار خمول، قويت قلبي وكملت، الرضعة الثانية الحمدلله مارجّع🥲 فكملت خلاص لحد ماكملنا اسبوع وصار يرضع رضعة كاملة من نان ووقفنا امينوفا على اخر نص علبة متوفرة عندنا🎉
من اول يوم لاحظت ان الحساسية بوجهه زادت، بس كملت ومع الوقت بدأت تخف من نفسها مع التنظيف والترطيب المستمر بكريم “كيو ڤي” للأطفال، ترطيبه ممتاز وسعره معقول وهو مخصص للبشرة الجافة والحساسة
وبكذا الحمدلله على نعمه الكثيرة♥️ تخلصنا من الحليبات ذوات القوام العجيب والتركيبات الغريبة والروائح العجيبة🥲 وصرت كل ما أفتح علبة “نان” أقول “اللهم لك الحمد على نعمك” وماصار يرجع مثل لما كان عمره شهرين
ميزة حليب نان عن “مثلاً اس ٢٦” ان نان ريحته حليب! ايوه ما أمزح😅 ريحته حليب مثل نيدو، اس ٢٦ ريحته مو حلوة🥲 فيه ريحة حديد ومدري كيف، صناعي بمعنى الكلمة، ماجربت غيرهم من التركيبة العادية لكن احساسي يقول لي اني مابلاقي مثل “نان” أبدًا😌
وبكذا أعتقد انتهت هذي الحكاية، فيصل مازال عنده اكزيما، لكن الحليب مش سببها، والدليل لما قطعناه ما اختفت.. طبيب الجلدية قال تقدرون كل اسبوعين تاخذون كورس مرهم “لوكويد”، عشان تختفي كم يوم وترجع شوي شوي على خفيف، من الآخر مافيه علاج نهائي للاكزيما إلى يومنا هذا، لكنها “ممكن” تختفي مع تقدم النونو بالعمر
اللي زعلني من البداية هو جزم الطبيب الأول انو فيصل عنده حساسية بروتين حليب البقر.. احس مو شي سهل وبسيط انك تحكم به، وانك تصدم أهل الطفل به، مهما كنت تشوفها حاجة بسيطة فهي شي بيحد من اكل فيصل بشكل كبييير ومو سهل، كان بالامكان تقول: جربوا اقطعوا الحليب لفترة وشوفوا..
أنا إلى الحين مؤمنة بغريزة الأمهات ان فيصل ماكان عنده حساسية من الأصل، وانه بس جاه فترة تعب فيها وصار يرجع كثير وبس
حبيت أكتب هذي القصة لأنها أثرت في حياتنا أنا وفيصل، وعشان يمكن مامات عيالهم مروا بنفس التجربة يستفيدون ولو بالدعم المعنوي منها
ودمتم سالمين🦋
أهلًا بالأصحاب
بدأت من نهاية العام الهجري الماضي اشتغل على تقويم هجري جديد لكن واجهتني بعض المشاكل وكان يخرب لما ينطبع فسحبت عليه
رجعت له من كم يوم وضبط معاي فكملته وحبيت. أشاركه معاكم 🙂
طبعًا التقويم للاستخدام الشخصي فقط ولا يجوز استخدامه تجاريًا
هذا شكل التقويم
وهنا رابط الطباعة
التقويم الهجري لعام ١٤٤٢هـ – الملف الأول
التقويم الهجري لعام ١٤٤٢هـ – الملف الثاني
التقويم مهيأ للطباعة على ورق مقاس A4
إذا طبعتوه حابة اشوف طريقة استخداماتكم له فشاركوني الصور على تويتر
أتمنى يكون عجبكم
ودمتم سالمين
أسعد الله أوقاتكم بكل خير يا أصحاب
بداية كل فصل دراسي، أكون ممشغولة جدًا وعندي ظروف، لكن كل مرة يجيني أسئلة انو هل بتسوين تقويم دراسي هالفصل؟
وبحكم اني ما أدرس من كم فصل، ما أتذكر أشتغل عليه من بدري
لذلك كل فصل تلاقوني أتأخر شوي بعدين أطلع بنفس التقويم كل مرة هههه
الحكاية اني أحاول أسرق وقت وأعمل تقويم جديد لكن مرة وقتي مايسمح
فااااا بس حبيت أبين لكم ليش متأخرة وبالأخير نفس الشكل
بس والله حلو ومشرق 🤣 وكل مرة أحاول أطلع بأحلى منه بس ما أقدر
كنت أبيه يكون فينتج هالفصل، لكن إلّوستريتر تغير فيه حاجة وتعععععبني مرة ماقدرت اعرف وش مشكلته وماكان عندي وقت للبحث
وبس والله
تفضلوا رابط الطباعة
التقويم الدراسي للفصل الأول ١٤٤٢هـ/٢٠٢٠م
وتمنياتي بعام دراسي مليء بالسعادة و الإنجاز والأمان
صباح الخير وطابت أوقاتكم بكل خير يا أصحاب
جبت لكم تقويم الأشهر من أغسطس ٢٠٢٠م إلى ديسمبر ٢٠٢٠م
في الحقيقة كنت باسحب على أغسطس وابدا من سبتمبر بما أن الدراسة تبدأ فيه
لكن بما أن الدوامات بشكل عام رجعت في أغسطس لذلك شملته معهم
راح تلاحظون ان التقويم بسيط جدًا ومافيه أي رسومات، اعتبروها حقبة جديدة من تصاميم مطبوعاتي 🙂
أضفت فيه اقتباسات من كتب وادي المومين للمؤلفة توفه يانسون، اخترت الاقتباسات القريبة جداً لقلبي
أتمنى يعجبكم التقويم ويكون مريح للنظر والاستخدام
من هنا ملف التحميل للطباعة
تقويم النصف الثاني من عام ٢٠٢٠م
ودمتم سالمين حرفيًا
طابت أوقاتكم بكل خير يا أصدقاء
صديقة طلبت تقويم الفصل الصيفي وماجبت شي جديد لكن جبت شي هههه
يختلف عن اللي قبله في انه بالطول مش بالعرض
هذا شكله، ورابط التحميل للطباعة بالأسفل
ان شاء الله بس التواريخ تكون صحيحة، بحثت ولقيت هذا التقويم بثلاث جامعات
ان شاء الله تستفيدون منه أو توصلونه لأحد عنده فصل صيفي
لتحميل التقويم من هنا
وبالتوفيق جميعاً
أهلاً بالأصدقاء
جبت لكم التقويم الدراسي لعام ٢٠١٩ – ٢٠٢٠ للفصل الأول باللغة الانجليزية
هنا التقويم ب١٦ اسبوع دراسة
رابط التحميل للطباعة من هنا
Academic Calendar 2019 – 2020 First Term 16 weeks
وهنا نفس التقويم ب١٨ اسبوع دراسة
رابط التحميل
Academic Calendar 2019 – 2020 First Term 18 weeks
Have a fantastic academic year🎯
نهاركم سعيد
بما ان العام الدراسي الجديد على وشك البدء، كل عام وأنتم منجزين وشاطرين
🌻
حبيت أشارككم تقويم دراسي صممته السنة الماضية لكن مازلت واقعة في حبه
هنا التقويم ب١٦ اسبوع دراسة
تقدرون تحملونه للطباعة من هذا الرابط
التقويم الدراسي للفصل الدراسي الأول لعام ١٤٤١هـ (١٦ اسبوع)
🎼
وهنا نفس التقويم ب١٨ اسبوع دراسة
ومن هنا الطباعة
التقويم الدراسي للفصل الدراسي الأول لعام ١٤٤١هـ (١٨ اسبوع)
أتمنى لكم سنة دراسية سعيدة
🌈🌧🌤
مدوّنة نهله 